Er Uzbekistan að fyllast?

Góðan daginn öll

Ég sé ekki betur en Uzbekistanferð sé í þann veginn að fyllast og allt bendir til að ég drífi mig því í rannsóknarferð þangað í júnílok eða byrjun júlí. Einnig er Íran og Jemen á góðu róli.
Því hvet ég menn til að láta heyra í sér því ég verð mjög upptekin við annað að sumri loknu og geri ekkert í málunum fyrr en ljóst er hvort af verður.

Það verða því í allra mesta lagi 2 ferðir eða þrjár á árinu 2011. Athugið það. Látið vinsamlegast berast og ég ítreka að ég get ekkert sagt um verð að svo komnu.

Gaman frá því að segja að nokkrir Íslendingar sem eru búsettir í Indlandi og vildu ferðast um nokkur -stan lönd og Íran, fengu lítil sem engin svör frá ferðaskrifstofum í Íran og benti ég þeim á okkar ferðaskrifstofu og þá leystust öll mál á farsælan hátt. Við höfum vissulega verið heppin með forstýrurnar okkar þar.

Nú kosningadagur og Júróvisjón á morgun. Þetta gæti orðið skrautlegt.
Bless í bili

Myndakvöld Líbanons/Sýrlandsfara----Fatimusjóður- Palestína

Frá Samarkand

Sæl öll

Í kvöld hittumst við félagarnir úr Líbanons og Sýrlandsferðinni í Kornhlöðunni, borðuðum saman og horfðum á myndasýningu sem Vera Illugadóttir stjórnaði af stakri kúnst.
Geta má þess svona til fróðleiks fyrir hina ýmsu ferðafélaga Veru að hún hyggur á nám í Svíþjóð næsta haust og ætlar að nema arabísku og Miðausturlandafræði og það finnst mér einstaklega vel til fundið og þykist þess fullviss að ferðir hennar með VIMA hafi orðið hvatning til þessa.

Á myndakvöldinu var m.a. frumsýnd skemmtileg vídeomynd sem Högni hafði gert um ferðina. Margir vildu síðan festa sér disk og var eftirspurn mikil. Og eins og Högna er von og vísa rann þetta svo rakleitt í Fatimusjóð og er þakkað virktavel fyrir það.

Nokkra félaga vantaði á myndakvöldið en þeir sendu kærar kveðjur og allir hugsuðu fallega til þeirra.
Þetta var hin notalegasta stund í alla staði.

Afmælisbókin er uppseld
Er nú að senda frá mér allra síðustu eintökin af Afmælisbókinni og er afskaplega hress yfir því. Inn á sjóðinn hafa komið fjórar milljónir eins og að var stefnt.

Stjórn Fatimusjóðs baukar nú við húsamálin og um eða í kringum mánaðamót verður stefnan tekin þangað til að reyna að ljúka málum.
Í þeirri sömu ferð vonast ég til að komast yfir til Palestínu til að kanna hvort grundvöllur er fyrir ferð þangað. Þátttaka er komin í þá ferð.
Læt ykkur fylgjast vandlega með.

Aðrar ferðir?
eru vitanlega Líbanon/Sýrland fyrir Bændaferðir í byrjun október og hún er löngu uppseld, skilst mér.
En
nú hafa ýmsir verið að tala um Íranferð og aðrir hafa enn hug á -stan löndum, svo sem Uzbekistan og t.d. Turkmenistan því ekki er vit í að hugsa um Kyrgistan vegna innanlandsástands þar. Í þriðja lagi hafa borist fyrirspurnir um Kákasus.
Ég hef skrifað þetta samviskusamlega niður og augljóst er að engin þessara ferða yrði fyrr en á næsta ári En eins og ég hef bent á fyrr og síðar verða menn að láta mig vita því ég les ekki hugsanir nema stöku sinnum og helst smala með sér nokkrum. Lágmark í hverja ferð er 20 manns og ég mun ekki gera neitt í þessu fyrr en sá fjöldi er kominn. Það þýðir ekkert að spyrja mig um verð því ég athuga ekkert slíkt nema þátttaka sé fyrir hendi. En auðvitað læt ég heldur engan borga neitt fyrr en allt er klappað og klárt.
Gjöra svo vel að hafa það bak við eyrun.

Þakka svo ferðafélögum ánægjulegt kvöld og öllum kaupendum afmælisbókarinnar fyrir þeirra liðsinni.

Bóksölu lýkur senn- myndakvöld ofl

Góðan daginn í vorúðanum

Finnst ástæða til að segja ykkur að nú er heldur betur farið að ganga á upplagið af afmælisbókinni og inn hafa komið um 3,5 milljónir að kostnaði greiddum.

Það verður að teljast skínandi gott en þó langar mig nú selja þessi eintök sem eftir eru og óska eftir velvilja og liðsinni við það svo takmarkið náist: að afmælisbókin skili Fatimusjóðnum 4 milljónum.

Bið menn lengstra orða að hafa samband, td. kaupa aukabók til gjafa- og það hafa raunar þó nokkrir þegar gert og vel það og fyrir það þakka ég kærlega.

Leyfi mér að biðja ykkur að senda þetta á nokkra vini ykkar í þeirri björtu von að þeir komi til aðstoðar og kaupi bók.

Flestir kaupendur eru einstaklingar en með hjálp Illuga og Hrafns hafa einnig nokkur fyrirtæki keypt 10-20 bækur. Kannski vinnur einhver félaga hjá fyrirtæki sem vill styðja málið og kaupa nokkur stykki?

Stjórnin skipti með sér verkum í gær á fundi á Drafnarstíg og Edda Ragnarsdóttir tók við gjaldkerastöðu en Guðlaug Pétursdóttir er vararitari en að öðru leyti óbreytt.

Þá eru í ritnefndinni ásamt Dóminik, Vera Illugadóttir og Hulda Waddel.

Í YERO hópnum eru þær Birna Karlsdóttir og Guðrún Halla og hyggst ég leita til tveggja í viðbót því mér þykir fyrirsjáanlegt að það sé full nauðsyn á því og ég mun biðja þennan hóp koma til fundar þegar nær dregur að skýrist um börnin okkar. Eins og áður hefur komið fram eru sex stúlkur sem geta byrjað háskólanám næsta haust og þarf að mynda hóp fimm styrktarmanna um hverja auk allra krakkanna sem æskilegt er að við höldum áfram að styðja.

Þá munu Sýrlands og Líbanonsfarar hittast í næstu viku á myndakvöldi og er það tilhlökkunarefni.