Hver er staða ferða og Fatimusjóður VIMA á harðahlaupum í maraþon.

Mynd Þóra Jónasdóttir:Við Pezhman Azizi, íranski leiðsögumaðurinn okkar. Af persónulegum ástæðum gat hann ekki verið með síðasta hóp en nú hafa þau mál leyst farssællega og hann verður með páskahópinn.
Staða ferða: Egyptaland í febrúar 2008, í þá ferð má bæta við tveimur. Tilkynnið snarlega
Íran um páska 2008: Vegna ófyrirsjáanlegra forfalla má bæta við 2-4. Tilkynnist
hið bráðasta vegna þess að flugsæti er mjög erfitt að fá á þeim tíma sem ferðin er ákveðin
Jemen/Jórdanía apr/maí 2008: Þar geta amk. 3-5 bæst við. Láta vita hið fyrsta
Jemen/Jórdanía maí/júní 2008: Þar getur vænn hópur bæst við. Láta vita innan tíðar.
Libya október 2008: Virðist fullskipuð. Reynslan segir mér hins vegar að fólk hætti við eða gefi sig fram með skömmum fyrirvara. Skrifa því á biðlista.
Gjörið svo vel og verið svo vinsamleg að láta þessar upplýsingar ganga

Og ekki má gleyma því sem nú kemur:
Vilt þú styrkja gott málefni?
Þann 18. ágúst næstkomandi fer fram Reykjavíkurmaraþon Glitnis. Þeir sem taka þátt geta valið að hlaupa í þágu góðgerðafélaga. Þá er hægt að heita á hlauparann og leggja góðu málefni lið. Við í Fatimusjóðnum hvetjum ykkur eindregið til að fara inná http://www.marathon.is/ og heita á hlaupara sem hlaupa í þágu okkar félags.

Níu íslenskir hlauparar af hverjum tíu safna áheitum til stuðnings starfsemi um 100 líknar- og góðgerðarsamtaka

Nærri lætur að níu af hverjum tíu skráðra Íslendinga í Reykjavíkurmaraþoni ætli að hlaupa í þágu líknar- og góðgerðarsamtaka að eigin vali. Þannig safna þátttakendur áheitum frá fjölskyldum sínum, vinnufélögum, vinum eða öðrum þeim sem vilja hvetja hlauparana til dáða og styrkja í leiðinni gott málefni.

Þátttakendur í Reykjavíkurmaraþoni geta valið úr hópi um 100 líknar- og góðgerðarfélaga af ýmsu tagi og safnað áheitum fyrir þau. Allir landsmenn, sem á annað borð nota greiðslukort og hafa aðgang að tölvu, geta síðan heitið á hlauparana og áheitaupphæðin rennur óskert til viðkomandi líknar- og góðgerðarfélags. Þá heitir Glitnir á starfsmenn sína og viðskiptavini og greiðir 3.000 krónur fyrir hvern kílómetra sem starfsmaður hleypur og 500 krónur á hvern kílómetra sem viðskiptavinur hleypur. Í fyrra söfnuðu 500 Glitnisstarfsmenn á þennan hátt alls 23 milljónum króna fyrir ýmis líknar- og góðgerðarsamtök. Í ár heitir Glitnir líka á viðskiptavini sína og þar með má fullvíst telja að tekjur líknar- og góðgerðarsamtaka af hlaupinu aukist verulega.

Af alls um 1.700 íslenskum hlaupurum sem þegar hafa skráð sig í Reykjavíkurmaraþonið, hafa yfir 1.500 valið sér góðgerðarfélög til að hlaupa fyrir. Mörg þessara félaga eða samtaka eru nú á þessum áheitalista í fyrsta sinn, önnur voru þar í fyrra og uppskáru sum hver miklar og óvæntar tekjur. Þannig skiluðu áheitin í Reykjavíkurmaraþoni Glitnis 2006 Geðhjálp ríflega 900.000 krónum, sem Sveinn Magnússon framkvæmdastjóri segir að hafi verið ánægjulegur búhnykkur. Verkefnalisti félagsins sé langur og þessir fjármunir hafi komið sér afar vel.