Hópast menn í tvo hópa til Líbíu- hver hefur veritascapital ofl gúmmulaði

Mynd: Massúd leiðsögumaðurinn minn í Líbíu

Góðan daginn góðir hálsar
Gleðilegt frá því að segja: Ferðir til Líbíu í haust verða tvær því nú hafa 37 greitt staðfestingargjald og mig vantar bara svör frá fjórum eða fimm, nú eða einhverjum öðrum þeim sem hefur hug á ferðinni.

Þá bið ég menn að athuga árið 2009- ekki ráð nema í tíma sé tekið því menn eru þegar farnir að skrifa sig í þær - sjá fréttabréfið síðasta. Allar fyrirspurnir eru teknar alvarlega.

Þakka væntanlegum Sýrlandsförum í sept. hvað þeir hafa verið snöggir að borga sitt staðfestingargjald og síðan 1. hvers mánaðar eins og allir hafa fengið vitneskju um.



Mynd: Hjördís Kvaran Einarsdóttir


Hér er mynd af þeim félögum í Egyptalandsferðinni, Georg okkar unga, indæla og flínka leiðsögumanni ásamt yngsta þátttakandanum, Örnólfi Hrafnssyni. Hef ákveðið eftir framgöngu hans í ferðinni að lækka aldurstakmark í 11 ár.

Egyptalandsfarar athugi að við efnum í smámálsverð og myndakvöld í byrjun apríl og vonast til að sjá sem flesta þar.

Áður en lengra er haldið: kannast einhver við addressuna veritascapital. Fæ alltaf bréf endursent með henni. Vinsamlegast gefa sig fram.

Íranfarar hefja nú senn pakkningu enda ekki nema rétt vika þar til við höldum af stað. Fékk í gær imeil frá forstýrunni okkar í Teheran þar sem hún segir allt til reiðu að taka á móti okkur. Leiðsögumaðurinn Pezhman Azizi verður á flugvellinum og allt í hinu besta standi. Bið Hermann að láta mig vita hvort ég á að senda honum miðana og vegabréf til Ísafjarðar eða hvort hann verður á flögri í bænum fyrr.

Ég er hóflega lukkuleg vegna undirtekta við bóksölunni en vona þó hið besta. Og nokkrir hafa tekið við sér og pantað og greitt snöfurlega. Fékk í gærkvöldi afmælisgjöf inn á Fatímusjóð.
Ég var í Egyptó á afmælinu mínu og kannski brenna einhverjir í skinninu að gefa mér smotterí í afmælisgjöf. Það er sjálfsagt óviðkunnarlegt að óska eftir afmælisgjöfum en best að láta slag standa og gera það samt því málefnið er gott. 1151 15 551212 og kt 1402403979.

Á eftir fer ég að afhenda velunnara okkar, Lofti Sigurjónssyni, myndir af tveimur Jemendrengjum sem hann styrkir og greiðir auk þess 80 þús á árinu í Fatimusjóð. Það er mikil rausn og elskuleg.