Þrátt fyrir kröggur og kynlegt stefnuleysi

látum við auðvitað ekki deigan síga, góðir félagar. Líbíuhópar voru sannarlega heppnir að SPRON hljóp undir bagga með mér fyrr í sumar, svo ég gat greitt báðar ferðirnar að fullu áður en krónan seig enn lengra.
Og þar sem flest er innifalið í Líbíu ættu menn ekki að þurfa að kaupa gjaldeyri fyrir nein ósköp. Fimm hundruð evrur er ugglaust yfrið nægur farareyrir plús hundrað dollararnir fyrir leiðsögumenn og bílstjóra úti.

Ég ætla að minna á að nokkrum dögum eftir að seinni Líbíuferð lýkur, hefjast svo námskeiðin mín hjá Mími símenntun, annars vegar 4ra kvölda námskeið um Menningarheim Araba og hins vegar arabíska I og ég vænti vænnar þátttöku. Hafa samband við Mími, vinsamlegast.

Núna áðan kom einn Sýrlands/Jórdaníufari til mín með einhvern fegursta blómvönd sem ég hef fengið, til að þakka fyrir ferðina. Slíkt yljar manni sannarlega um hjartaræturnar, svo og aðrar elskulegar kveðjur frá ýmsum í þeim góða hópi.

Óska Guðmundu Kristinsd til hamingju með sýninguna hennar sem var opnuð í dag. Vonast til að komast til að skoða eftir helgina.

Varðandi Fatímusjóð: nú eru að skila sér greiðslur vegna kreditkortareikninga svo innan tíðar verður klárt hvað kom inn á markaðnum og hvernig byggingarstjóðurinn stendur.

Búin að borga þá reikninga sem þurfti að borga og ég fæ ekki betur séð - hvað sem þessu kreppta efnahagsástandi líður - og auðvitað tekst okkur að kaupa nýtt hús fyrir skólann. Hyggst fara til Jemen í desember í nokkra daga eftir að námskeiðum lýkur og þá ræðum við Nouria um næstu skref svo ég taki til orða eins og þessir leiðindapólitíkusar sem enga lausn kunna.

Enn eru nokkrir styrktarmenn sem hafa ekki látið í sér heyra og sé ekki betur en ég verði að leita til þeirra sem höfðu boðið hjálp sína fram ef styrktarmenn greiddu ekki. Það er ekki kurteist að láta mig ekki vita hvernig og hvenær menn hugsa sér að borga ef fólk er að lýsa yfir að það vilji styrkja krakkana.Ef ég heyri ekkert frá þeim sem hafa ekki borgað svo mikið sem krónu með sínum börnum leita ég til annarra á mánudaginn. Þetta getur ekki gengið svona að fólk sýni ekki minnsta lit.Því engan hef ég þvingað til að borga svo ég viti til. Og þakka kærlega öllum sem hafa greitt, borga reglulega og skv. því sem þeir hafa sagt mér. Þetta eru fimm börn sem um er að tefla. Heildarlistann birti ég svo þegar það er allt komið á hreint og vonandi áður en ég fer til Líbíu enda þarf ég að senda Nouriu fyrir amk. 30 börn til viðbótar í næstu viku.

Talaði um Fatímusjóðinn hjá Rotaryklúbbnum Reykjavík austur í vikunni og það var hið besta mál og áhugi góður. Einnig heppnaðist ferðin okkar Gullu Pé til Kefló mjög vel og ég fékk umsagnir þátttakenda sendar og þær voru prýðilega jákvæðar. Mér var sagt í kvöld að arabískunámskeiðið væri fullskipað, ath hvort annað verður. Hvet fólk til að koma á námskeiðið um menningarheim Araba, þar held ég að séu enn laus pláss.

Munið svo myndakvöld Jemenfara. Vantar enn svör frá fáeinum og nokkur spurningamerki eru viðtvo eða þrjá. Þá loksins við efnum í myndakvöldið vonast ég sannarlega til að sjá flesta með sínar myndir og sína diska.


Þegar ég kem frá Líbíu mun ég eindregið óska eftir að menn staðfesti sig í ferðir. Það má ekki seinna vera. Gjörið svo vel og athugið það.