Við erum komin heim til Ísland eftir góðar íRANSVIKUR

Góða kvöldið, allar mínar gæskur

Við erum sem sagt komin til ættjarðarinnar, öll hygg ég megi segja í glöðu og góðu formi eftir fínar tvær vikur í Íran.

Menn voru angurværir á Keflavíkurflugvelli þótt öllum þætti gott að vera kominn heim í kuldalegan heiðardalinn.

Ein taska skilaði sér ekki, Þorsteins Mána en eftir nokkra rannsóknarvinnu vinsamlegs starfsmanns á Keflavíkurflugvelli fannst hún í Amsterdam og mun trúlega leita heim á morgun.
Einhverjir tveir gleymdu að láta mig hafa farangursnúmer svo þetta tók lengri tíma en ella hefði þurft. Hef sjálfa mig og Árna Björnsson grunuð og kannski einn til viðbótar sem ég get ekki áttað mig á hver er.

Ferðin með KLM var í hvívetna þægileg. Vöknuðum rétt fyrir þrjú s.l nótt og allir voru komnir í rútuna á mínútunni. Tókst að fá hóptjekk handa okkur og ýmsum hugnaðist það vel því líklega hefur yfirvigt verið töluverð einkum vegna smávegis teppakaup.
Flugið ágætt til Amsterdam hið ákjósanlegasta með afbragðs þjónustu og sjálfsagt að nota þessa flugleið ef frekari ferðir eru áformaðar.
Biðum ekki nema tvo tíma á Skiphól, rétt til að sukkhópurinn gat reykt og drukkið kaffi og aðrir verslað eitthvað smotterí sem bráðvantaði.

Ætlaði að skrifa inn á síðuna frá Laleh í gærkvöldi en tölvan þar var slöpp svo ég ákvað að bíða með það.

Ferðin frá Esfahan í gær til Teheran er mögnuð í fegurð og ekki skaðaði að ég gat bent fólki á tvö stórhttæuleg kjarnorkuver og heilaga borg, Qom og vi8ð vorum komin með fyrra fallinu til Teheran. Var sungið og glaðst og léku þar aðahlutverkin Árni, Þröstur og Sveinn Einarsson að ógleymdri Hólmfríði.

Þá fór fram úrslitakeppnin í keppni um aldur og stjörnumerki Mohammeðs leiðsögumanns, Mohammeðs bílstjóra og Heiðar aðstoðarmanns. Eftir æsispennandi keppi stóðu Edda Gísladóttir og Birna Karlsd uppi sem sigurvegarar og þeim verða afhent verðlaun á aðalfundi VIMA þann 28.apríl n.k.

Borðað á Laleh í gærkvöldi og þangað kom Nasrin frá ferðaskrifstofunni og afhenti öllum góðar saffrangjafir, ég gaukaði Íslandsbók að Múhammeð gæd og annarri að Múhammeð bílstjóra og Heiðar fékk konfektkassa. Einnig bað ég Nasrin að koma disk frá Auði Guðjónsdóttur til okkar íhugula ræðismanns

Birna Karls talaði og lýsi gleði með ferðina en aðalræðumaðurinn var Árni Björnsson -sem hafði þá nýlega orðið sér úti um tölvumúsarmottu svo tengdadóttirin Linda gæti haldið áfram skrifum - og mæltist honum vel og drengilega. Að vísu hélt ég um stund að hann væri að gera grín svo vel útilátið var hrósið en þegar hann vék léttu hjali að lítilsháttar (neikvæðri) spennu sem hefði verið milli mín og Múhammeðs leiðsögumanns sem ég hélt í einfeldni minni að enginn hefði tekið eftir, ákvað ég að taka þessu öllu sem hinu blíðlegasta hrósi. Og sýnir að Árni er næmur drengur því ekki þarf orðum að fara um það að ég saknaði okkar góða Pezhmans.

Hann og kona hans og dóttirin litla borðuðu með okkur í gærkvöldi. Pezhman bað fyrir kærustu kveðjur til fyrri hópa og verður vonandi með næst.

Jemenhópur skal svo hittast til skrafs og undirbúnings þann 17.mars og sendi þeim imeil þar að lútandi. Hef ekki gefið mér tóm til að athhuga það mál en vona að allir hafi greitt upp í TOPPP því sú greiðsla er öll farin frá mér fyrir æðistundu.