Kátína hjá Íranförum- fyrirspurnir um verðhækkun ofl

Góðan daginn

Íranhópurinn hittist sl. mánudagskvöld og átti góða stund saman. Þar voru sýndar myndir í föstu og fljótandi og m.a. sýndi Högni vídeomynd sem hann hafði gert um ferðina. Svo borðuðu menn góðan fisk og skröfuðu og fannst gaman að endurlifa ferðina í gegnum fínar myndir.

Jemen/Jórdaníufarar hittast n.k. föstudag að sækja sína miða og ferðagögn. Þar bið ég alla að mæta stundvíslega skv. bréfi sem ég hef sent til allra í ferðinni. Nokkrir hafa lagt inn í Fatímusjóðinn og ég mun því geta fært Nouriu og krökkunum okkar smáglaðning og trúlega borgað amk hálfs árs kennaralaun.

Á föstudag sendi ég út Líbíulistann og þá verður samtímis dregið af VISA kortinu (þ.e. mínu Visakorti sem ég nota vegna ferðalaganna eingöngu)fjórðungur fargjaldsins, bæði í fyrri og seinni ferð.Þessir peningar fást ekki endurgreiddir af British Airways.
Því mun ég á föstudaginn setja inn seinni listann.Ég hef ekki fengið svar frá Ingu Hersteinsd en Ólafur S. er með í leiknum og gott mál er það. Enn eru einir þrír sem hafa ekki greitt maígreiðslu v/Líbíu, er ekki hress með það. Ítreka að menn borgi á tilskildum tíma.

Hef fengið fyrirspurnir um hækkun á ferðunum og þeim get ég ekki svarað að svo stöddu en hún verður nokkur, annað er óhjákvæmilegt. Það bættist þá væntanlega við síðustu greiðslu, bæði fyrir Sýrland í sept og Líbíu í okt/nóv. Reyni að hafa það allt temmilegt en óhugsandi annað vegna þessara miklu breytinga á gengi og nú rukka allar erlendar ferðaskrifstofur og flugfélög í evrum svo það er engin miskunn.

Svo er augljós eftirspurn í ferðirnar 2009 svo ég skrifa niður í þær, skuldbindingalaust og engin staðfestingargjöld fyrr en í september eða svo.
Minni því á Óman í febrúar, Sýrland/Líbanon í mars og páskar í Íran í apríl. Jemen yrði svo væntanlega í maí og Úzbekistan/Kyrgistan í byrjun júní. Ef guð lofar.
Hvet menn til að láta vita um áhuga.

Vinsamlegast sendið slóðina áfram.
Ekki meira að sinni. Látið frá ykkur heyra.