Dagbók Ingvars frá Íran- myndafundur- marsferð ofl

Sæl veriði
Ingvar Teitsson, læknir, sem var í seinni Íransferðinni á dögunum hefur sent mér dagbókina um ferðina og er vísað til hennar á sérstökum hlekk á síðunni. Hvet menn lengstra orða til að kynna sér skrif Ingvars sem er glöggur maður og ritfær svo allir ættu að græða á lestri hvort sem þeir hafa farið til Íran eður ei.

Vil þó aðeins nefna eitt atriði: teppasalar í Isfahan berjast mjög um viðskiptavini enda oft og einatt um verulegar upphæðir að tefla. Eins og ég hef sagt frá áður var ég í Íran í mánuð fyrir fjórum árum og notaði þá tækifærið og kynnti mér teppabúðir því verð og gæði fara ekki alltaf saman þótt allir séu guðsheilagir í framan.

Mér var tjáð að skv reglum hins islamska lýðveldis hefðu verið settar reglur um að hvorki staðarleiðsögumenn né fararstjórar mættu taka umboðslaun- sem er að vísu alþjóðlegt fyrirbrigði.Þær reglur gilda enn og er fylgt eftir og allt slíkt er sem sagt bannað í Íran, svo hvorki Pezhman né ég græðum á viðskiptum sem menn gera. Nema náttúrlega að ég hef afskaplega gaman af því að prútta fyrir mitt fólk.

Þessi hópur ætlar svo að hittast í hádeginu n.k. laugardag og fá sér persneskt snarl, skoða myndir og rifja upp ferðina og mér sýnist ágætis þátttaka vera á þeirri væntanlegu samkundu

Þá vil ég taka fram að ég loka Líbanon/Sýrlandsferð þann 25.nóv Ýmsir sem höfðu látið í ljós áhuga á þeirri ferð(mars/apríl- dagsetningar eru ekki ákveðnar) hafa ekki látið vita. Allt virðist þó sem stendur benda til að af þeirri ferð verði því ýmsir nýir hafa frétt af þessari hugsanlegu ferð og skráð sig snarlega.