Perluævintýrið og aðsóknin í dag

Þessar tvær myndir eru frá Perlusúknum í gær og dag. Ljósmyndir: Ragnheiður Arngrímsdóttir

Ævintýrið hélt áfram í Perlunni í dag, sunnudag, og mikill mannfjöldi allan daginn og mikil sala. Verðlækkun um helming strax frá byrjun og það kunnu menn vel að meta.
Þegar leið á síðdegið tilkynnti Ásdís Halla enn frekari kostakjör og menn gætu fyllt plastpoka af varningi og greitt fyrir 400 kr og þá varð hún aldeilis handagangur í öskjunni og mokaðist af borðum og slám og ofan í pokana.

Við tókum svo til, Edda Ragnarsd beitti sér fyrir því að koma restinni af fötunum til Rauða krossins, fataslár fara til síns heima á morgun, skilti og myndir voru tekin niður og kl. rúmlega hálf sex vorum við að mestu búin að öllu. Þetta var hreint og beint geggjað.

Ég er ekki með lokatölu um söluna í dag, hún hefur að öllum líkindum verið um 2,5 milljónir. Við það gæti bæst eitthvað, því ýmsir vildu leggja inn og fengu reikningsnúmer. Sömuleiðis ákváðu sérfræðingarnir, Sigríður Ásgeirsdóttir, Matthildur Ólafsdóttir og Herdís Kristjánsdóttir í skargripadeildinni að gera það ekki endasleppt heldur fara með nokkra MJÖG verðmæta gullmuni og athuga hvort einhver vænn gullsmiður væri til í að taka að sér að selja það fyrir okkur. Sjáum til með það.

Mér sýnist því salan á markaðnum núna vera í kringum 22 milljónir króna
Þessi tala kynni að breytast eitthvað smávegis en hún lækkar örugglega ekki. Fæ fregnir um það frá Ragnýju Guðjohnsen í kvöld eða fyrramálið en hún hefur verið bjargvættur í öllum þeim fjölþættu skriffinnskumálum sem þurfti að hafa á hreinu svo og sér hún um talninguna endanlegu.


Ég bakaði slatta af Fatimukökum í gærkvöldi en þær fóru eins og skot. Þar sem nokkrir komu að máli við mig og höfðu bragðað kökuna í famelíuboðum í gær og uppskriftablöðin til þurrðar gengin var ég beðin að setja uppskriftina hér og geri það með mestu ánægju.


Fatimukaka

Efni
1/3 bolli brætt smjör
3 egg
½ bolli sykur
Vanilludropar
½ bolli hveiti
½ teskeið lyftiduft

Sett ofan á

½ bolli smjör
½ bolli sykur
1/3 bolli hunang
½ tesk. Kanill

Smyrjið kökuform. Hitið ofninn í 200 gr.
Hrærið egg, sykur og vanilludropa vel og vandlega. Bætið í bræddu smjöri og hrærið
Bætið hveiti og lyftiduft saman við og hrærið gætilega. Sett í bökunarform og bakið í 10-12 mínútur.
Á meðan má bræða smjörið við lágan hita og bætið við hunangi, kanel og sykri. Hrærið vel og þegar það er í þann veginn að sjóða takið þá af pönnunni og hellið yfir kökuna. Setjið hana aftur í ofninn um 15-20 mínútur

Lánsgripir

Ég er með tvær ferðatöskur af lánsvarningi, kjólum og fleiru. Hef einnig allmarga tónlistardiska sem okkur voru léðir. Hef ekki fengið fötin v/hnífadansins ennþá. Athuga það á morgun.
Nú verð ég að viðurkenna að ég er ekki klár á því í öllum tilvikum hver á hvað svo ég bið ykkur að láta frá ykkur heyra.
Einnig bið ég Guðrúnu Ögmundsdóttur sem annaðist undirbúning hnífadansins ásamt Hafdísi í Kramhúsi að koma til mín pilsum og dressum og jambium- hið allra fyrsta.

Og svo er það Jórdanía og Sýrland
n.k. sunnudag. Nú getur maður farið að hlakka til þeirrar ferðar.

Bið Líbíufara að klára sínar greiðslur á morgun og þriðjudag.

Þegar ég kem heim úr Sýrlandi/Jórdaníu er svo nauðsynlegt að menn fari að gefa sig fram í ferðirnar 2009. Má ekki seinna vera. Eins og málin standa í augnablikinu er Kákasusferðina í bið. Vonandi skýrist það.